Gott aus Gott und Licht aus Licht – Was unsere Ohnmacht erhellt
Predigt zum 3. Advent 2022, Stadtkirche, Pfarrerin Ruth Oppliger
Gott aus Gott und Licht aus Licht,
Feuer, das aus Feuer bricht,
Ewigkeit, noch nie erkannt,
Himmel, der zur Erde fand.Licht, das sich den Hirten zeigt,
Wort, das in Palästen schweigt,
Macht, die unsre Ohnmacht sieht,
Gott, der seinen Himmel flieht.Lobt die Macht, die sich verneigt.
Lobt den Himmel, der nicht schweigt.
Lobt das Licht, in uns entfacht,
Licht aus Licht in unsrer Nacht.RG 430,1.2.7
Das si di erschte zwo u di letschti Strophe vom Lied 430 usem reformierte Gsangbuech, wo mir hei gsunge. D Melodie vo däm Lied isch üs us auter Zeit überlieferet, si geit bis is Johr 900 n.Chr. zrugg. 1524 het dr Martin Luther na däm aute Hymnus die Melodie komponiert.
Dr Text vom Lied isch modern, är stammt vom Georg Schmid u isch vo 1990. Äs isch äs Wiehnachtslied, äs Gloubenslied, äs Lied übers Liecht. Dr Inhalt vom Lied zeichnet sech dür Gägesätz us, wo aber glichzitig dürne Ganzheit verbunge wird. Ds Lied isch nid unbedingt logisch, aber grad so isches em Läbe nächer. Äs isch äbe äs Lied vo Gott, wo Mönsch wird. Däm Gschehe säge mir Wiehnachte.
Im Lied wird di Gschicht i neui Wort gfasst. Aber wi cha ds Unvorschteubare überhoupt i Wort gfasst wärde? D Wort vom Lied si ä Versuech, üs Mönsche mit Sinnbiuder das wunderbare Ereignis nöcher z bringe. Was dr Verstand nid cha fasse, wird dür Symbol zuegänglicher u erfahrbarer, wüu Sinnbiuder dr ganz Mönsch chöi aspräche u berüehre, nid nume dr Verschtang. Gott wird Mönsch. Ime chliine Ching chunnt si uf d Wält.
Worum isch das passiert? Wüu Gott Liebi isch. Si isch die Chraft, wo Läbe schaffet, wo ds Läbe behüetet u wo üs Mönsche wott noch si. Dr Georg Schmid seits eso: Für üs z zeige, was Mönschsi bedütet.
Är het i 7 Strophe ä Füui vo Gedanke u Biuder zämegfasst, wo wichtigi Inhaute vor christleche Theologie umfasse. Derzue us jeder vo de 7 Strophe ä Ussag:
7 D Macht, wo sech verneigt
6 Liebi, wo em Find vergit
5 Friede, wo ke Sturm zerstört
4 Läbe, wo us Gott entschteit
3 Ching, wo vonim d Mueter singt
2 Macht, wo üsi Ohnmacht gseht
1 Gott us Gott u Liecht us Liecht
Am Afang vom Johannesevangelium, wo mir ir Läsig hei ghört, schteit ou ä bsungregi Version vor Wiehnachtsgschicht. Verzeut isch d Mönschwärdig vo Gott i philosophische Gedanke. Ou dert schpiut d Liechsymbolik ä zentrali Roue (Joh, 1-14).
Ds Sinnbiud vom Liecht isch im Lied RG 430 zentral. Liecht isch eis vo de hüfigschte u wichtigschte Symbol ir Bibel für das z beschriebe, was mit Gott gmeint cha si. Jesus, wo vor Maria gebore wird, isch ds Ching vo Gott. Licht aus Licht. Är isch ds göttleche Liecht, wo zu de Mönsche chunnt. Jesus säuber het vo sich gseit: «Ich bin das Licht der Welt.»
«Gott aus Gott und Licht aus Licht - Macht, die unsre Ohnmacht sieht, Gott der seine Himmel flieht…» So chame, na mir Meinig, di 7 Strophe vom Lied churz zämefasse. Ds Liecht schiint de Hirte u Hirtinne, wo ds Ching ds Bethlehem vor langer Zyt hei bestuunet. U ds Liecht schiint genauso üs Mönsche, Ching, Froue, Manne u aune, bis hüt.
Das göttleche Liecht schiint i üsi Ohnmacht. Das isch d Wiehnachtsbotschaft für üs: Gott chunnt is sim Ching Jesus zu üs aus Liecht u cha üsi Ohnmacht erhäue, wüu är se gseht. Gott isch noch bi üs u nimmt üsi Nacht, d Schwachheit, ds Leid, wahr. Gott schänkt üsere Ohnmacht Ufmerksamkeit, so wird si ärnscht gno u cha veränderet wärde.
Gott lüüchtet i üsi Ohnmacht, i üsi Schwächine. Us Untätigkeit cha so ä Wäg zum Handle wärde. Wiehnachte heisst: Gott chunnt zu üs, Gott schiint id Finschternis aus Liecht u git üs so d Fähigkeit, ä Schritt us dr Ohnmacht z mache. Mit jeder no so chline Tat chöi mir üs izsetze für d Wält vo Gott. Ohnmacht, das isch ä Zuestang, wo mir ke Macht drüber hei. Ohnmächtig, machtlos z si, das isch unagnähm u macht hiuflos.
Ds Liecht schiint i üsi Ohnmacht. Das isch d Botschaft vom Advänt: Mir hei Ateu am Liecht vo Gott, wo üs fähig macht, z würke fürne grächti Wäut.
Gott us Gott u Liecht us Liecht u was üsi Ohnmacht cha erhäue… Am 10. Dezember isch jedes Johr dr Tag vo de Mönscherächt. Dr UNO Generalsekretär Ban Ki Moon het 1991 dr 25. November zum Tag gäge Gwalt a Froue usgrüeft. Sit denn louft jährlech vom 25.11.-10.12. ä wältwiti Kampagne «16 Tage gegen Gewalt an Frauen» u gäge d Gwaut überhoupt. Ir CH leitet u koordiniert dr CFD (Christlicher Friedensdienst) di verschiedene Aktione, wo dr Ufklärig diene. Im 2022 schteit ds Thema «Femizide» im Zentrum. D «Orange Days» si wiederum ä spezielli Aktion, wo während dene 16 Tag wäutwiit wichtigi Gebäude orange aglüchtet wärde, - ds Burdlef si das aube d Stadtchiuche u ds Schloss. I däm Johr isch us Spargründ druf verzichtet worde.
Dr Isatz für Grächtigkeit u Friede isch dringend nötig. Äs isch wichtig, dass Mönsche a Friede gloube u sech derfür isetzte, trotz auem. Ir Konflikt- u Friedensforschig isch es nid ä fromme Wunsch, dass Konfliktlösigsstrategie chöi würke. Äs wird intensiv a wüsseschaftleche Methode gschaffet, für d Friedensförderig z verbessere. Dra beteiliget sech ou d ETH. Äs isch grad uf SRF im Magazin Einstein ä Bricht derzue cho.
Gott, Liecht, Himmu, wo uf d Ärde chunnt, Läbe, wo us Gott entschteit, so heissts im Liedtext. Das si Wort vor Hoffnig! U üsi OHNMACHT cha sech wandle. Mängisch si mr zwar ohnmächtig, aber i bi überzügt, mir hei trotzdäm gnue Macht, säuber Liecht für angeri z si.